کراچی (ڈیلی اردو) صوبہ سندھ کے صوبائی حکومت کراچی کے علاقے سہراب گوٹھ میں واقعہ انڈس پلازا کے قریب نامعلوم افراد کی فائرنگ سے دو پولیس اہلکار ہلاک ہوگئے۔
پولیس کے مطابق علاقے میں گشت پر مامور اہلکاروں پر موٹرسائیکل پر سوار ملزمان نے اندھا دھند فائرنگ کی جس کے نتیجے میں دونوں موقع پر ہی ہلاک ہوگئے، جس کے بعد اُن کی لاشوں کو ضابطے کی کارروائی کیلئے عباسی شہید ہسپتال منتقل کیا گیا۔
پولیس حکام کے مطابق ہلاک ہونے والے اہلکاروں کی شناخت رحمت اور حکیم کے ناموں سے ہوئی، جن میں سے ایک اہلکار کو تین جبکہ دوسرے کو ایک گولی لگی۔
واقعے کے بعد پولیس اور رینجرز کی بھاری نفری جائے وقوعہ پر پہنچی اور کرائم سین کو سیل کر کے شواہد اکھٹے کیے۔
پولیس حکام کے مطابق واقعے سے متعلق تحقیقات جاری ہیں اور معاملے کی نوعیت کو دیکھا جارہا ہے۔
