میرانشاہ (نمائندہ ڈیلی اردو/ٹی این این) صوبہ خیبر پختونخوا کے قبائلی ضلع شمالی وزیرستان کے علاقے میرعلی میں کھجوری چیک پوسٹ کے قریب ایک دھماکے میں 3 بچے ہلاک ہوگئے۔
تفصیلات کے مطابق دھماکا شمالی وزیرستان کے علاقے میر علی میں کجھوری چیک پوسٹ کے قریب دوپہر کے وقت کھیت میں ہوا ہے جس کی زد میں تین بچے آئے جو کہ اس وقت وہاں بکریاں چرانے کے لیے آئے ہوئے تھے۔
ہلاک ہونے والے بچوں کی عمریں 5 سے 15 سال کی درمیان ہیں۔ ہلاک ہونے والے بچوں کا تعلق کھجوری ذاکر خیل گاؤں سے ہے۔
پولیس نے لاشیں ہیڈ کوارٹر ہسپتال میرعلی منتقل کردی ہیں۔
یاد رہے تین روز قبل شمالی وزیرستان میں 6 حجاموں کو بھی گولیاں مار کر ہلاک کیا گیا تھا۔
ہلاک کیے گئے افراد پیشے کے لحاظ سے حجام تھے اور مقتولین کی میر علی بازار میں ہیئر کٹنگ کی دکانیں تھیں۔ تمام مزدوروں کو نامعلوم افراد نے رات کی تاریکی میں فائرنگ کرکے ہلاک کیا گیا۔
چند روز قبل شمالی وزیرستان کے تحصیل سپین وام سے 8 غیر مقامی مزدوروں کو اغوا کیا گیا تھا۔ مقامی ذرائع کے مطابق ان مزدوروں کو گاؤں ششی سے اغوا کیا گیا۔
مغوی افراد سیکیورٹی چیک پوسٹوں کی تعمیر کا کام کررہے تھے۔ پولیس کے مطابق یہ مزدور ماڑی پٹرولیم کمپنی کے تھے۔ ان میں سے 5 کا تعلق ضلع لکی مروت سے ہے جبکہ 3 کا جنوبی وزیرستان سے ہے۔
